2025 он гарсаар ой, хээрийн түймэртэй холбоотой 71 гэмт хэрэг, 5 зөрчлийн шинжтэй гомдол мэдээлэл цагдаагийн байгууллагад бүртгэгдээд байна. Эдгээрийн дотроос 12 гомдол мэдээлэлд хэрэг бүртгэлийн хэрэг нээж, 5-ыг нь харьяаллын дагуу шилжүүлсэн бол 4 гомдолд мөрдөн шалгах ажиллагаа явагдаж байгаа талаар Экологийн цагдаагийн албаны Урьдчилан сэргийлэх хамтын ажиллагааны хэлтсийн дарга, цагдаагийн хурандаа З.Хүрэлбагана мэдээллээ.
Тэрбээр, мөрдөн шалгаж буй дөрвөн гомдол нь эзэнгүй, цаг агаарын огцом хуурайшилттай нөхцөлд аянга бууснаас үүдэлтэй болох нь тогтоогдсон гэв. Харин нийт бүртгэгдсэн түймрийн 70 орчим хувь нь ил задгай гал түлэх, үнс нурам хаях, яндангаас оч гаргах, асаасан чүдэнз, тамхи зэрэг хүний болгоомжгүй, хариуцлагагүй үйлдлээс үүдэлтэй байжээ.
ЦУОШГ-ын Урьдчилан мэдээлэх хэлтсийн ахлах мэргэжилтэн О.Оюунчимэг цаг агаарын нөхцөл байдлын талаар дараах сэрэмжлүүлгийг өглөө. Түүний мэдээлснээр баяр, наадмын амралтын өдрүүдэд орон нутгийн олон бүс нутагт дуу цахилгаантай аадар бороо орох төлөвтэй байна. Тухайлбал, маргааш баруун болон төв, зүүн аймгуудын зарим хэсэгт, 11-нд төв, зүүн, говийн бүсийн зүүн хэсгээр, 12-нд баруун аймгуудын ихэнх нутагт, 13-нд төвийн аймгууд болон зүүн бүсийн баруун хойд хэсгээр, 14-нд төв, говь, зүүн аймгуудын нутгаар, 15-нд зүүн бүсийн зүүн хэсгээр бороо, дуу цахилгаантай бороо орно. Иймээс иргэд гэнэтийн байгалийн үзэгдлээс сэргийлж, цаг агаарын мэдээг тогтмол хянахыг зөвлөж байна.
Энэ онд нийт 170 удаагийн ой, хээрийн түймэр бүртгэгдсэнээс 25 хувийг хиймэл дагуулын дулааны цэг илрүүлэлтийн системээр, 6 орчим хувийг нисдэг тэргээр тандан илрүүлж, холбогдох арга хэмжээг шуурхай авч хэрэгжүүлж байгаа ажээ.
