Улаанбурхан өвчний халдвар хэдхэн сарын дотор арван мянга хүрч өнөөдрийн байдлаар /2025.06.30/ 10721 болсон нь улс орон даяар SOS болох хэмжээнд хүрээд байна. Үүнтэй холбогдуулан ЭМ-ийн шинэхэн сайд Ж.Чинбүрэн улаанбурхан өвчний дэгдэлтийн эсрэг шуурхай арга хэмжээ авч эрүүл мэндийн салбарыг өндөржүүлсэн бэлэн байдалд шилжүүлээд байна. Тэрбээр саяхан хийсэн цахим мэдэгдлээрээ улаанбурханы эсрэг вакцинд хамрагдаагүй хүүхдийг ирэх намар цэцэрлэг, сургуульд хүлээн авахгүй гэсэн нь сүржигнэл биш бөгөөд ноцтой дэгдэлт үүсэхээр байгааг олон нийтэд сануулсан анхааруулга юм. Үүнтэй холбогдуулан нийслэл, дүүргийн Эрүүл мэндийн төвүүд онцгой нөхцөлд байнгын бэлэн байдалд ажиллаж байна.
Засгийн газар ч ч улаанбурханы дэгдэлтэд онцгой анхаарал хандуулж эхэлсэн бөгөөд маргааш буюу 2025 оны 7 дугаар сарын 1-ний өдөр Монгол орон даяар сум, дүүргийн өрхийн эрүүл мэндийн төвүүдэд “Улаанбурхан өвчний эсрэг нөхөн дархлаажуулалт”-ын мэдээлэл өгөх өдөрлөг зохион байгуулагдах гэж байна.
Нийслэлийн хамгийн ачаалалтай буюу Баянзүрх дүүрэг 500 орчим мянган хүн амтай, 128 мянга гаруй өрхтэй.
Одоогоор 2000 гаруй тохиолдол тус дүүргийн хэмжээнд бүртгэгдсэн бөгөөд шуурхай арга хэмжээ авч ажиллажээ.
Улаанбурхан өвчний эсрэг дархлаажуулалтыг ӨЭМТ-ийн байнгын 41, явуулын 41 цэгээр нийт 195 хүний бүрэлдэхүүнтэйгээр зохион байгуулж, 0-14 настай 57 мянга гаруй хүүхэд буюу 88 хувийг нь дархлаажуулалтад хамруулснаар хамгийн өндөр үзүүлэлтэй байна.
Тус дүүргийн байнгын 41 цэг уртасгасан цагаар, долоо хоногийн долоон өдөр ажиллаж байгаа юм байна.
