Малайзын төрийн мэдлийн эрчим хүчний “Петронас” компанийн эзэмшлийн хийн хоолойд мягмар гарагт гал гарсны улмаас 100 гаруй хүн бэртсэн тухай Гал түймэртэй тэмцэх газраас мэдээлжээ.
Ройтерс, Франс Пресс агентлагуудын мэдээлснээр, 60 орчим хүн түлэгдсэн, амьсгалахад хүндрэл учирсан болон бусад шалтгаанаар эмнэлэгт хүргэгджээ. Нийслэл Куала-Лумпурын ойролцоо болсон ослын улмаас олон хүн орон гэрээ орхин дүрвэсэн байна. Мөн түймэрт 49 байшин барилга эвдэрч сүйдсэн гэж гал сөнөөгчид мэдээлжээ.
Селангор мужийн гал түймэртэй тэмцэх албаныхны мэдэгдсэнээр, баяр ёслолын үеэр гарсан гал нь “500 м орчим урт хоолойгоос хий алдагдсанаас” үүдэлтэй байна. Уг хоолойн хавхлагыг хаасан гэж мэдэгдэлд дурджээ. Ослын газрын ойр орчимд байсан хүмүүсийн хэлснээр, түймэр олон км-ийн зайнаас харагдаж байжээ. Галд өртсөн долоон оршин суугчийг гэртээ байхад нь аварсан байна.
Селангорын Гамшгийн уршгийг арилгах хорооны дарга Мохд Нажван Халими Бернама агентлагт мэдээлэхдээ, Кампунг Куала Сунгай Бару тосгонд хүмүүс байшинд гацсан бөгөөд аврах ажиллагаа үргэлжилж байна гэв. Лалын шашинтнуудын Рамадан сарын эцэст болдог Ийд баярын үеэр уг осол гарчээ.
Эх сурвалж: Montsame.mn
