Парис-2024 олимпын наадамд дэлхийн нийтийн анхааралд өртсөн Алжир улсын боксчин Иман Хелиф зохиолч Ж.К.Роулинг болон Илон Маск нарыг цахим дээрэлхэл үйлдсэн хэмээн шүүхэд хандсан байна.
Хелифийн өмгөөлөгчийн мэдээлснээр тэрбумтан Илон Маск болон Харри Поттер цувралын зохиолч Ж.К.Роулинг нарыг олон нийтийн сүлжээнд бичсэн сэтгэгдлийнх нь төлөө шүүхэд өгсөн гэв.
Тодруулбал Хелиф болон Италийн тамирчин Анжела Карини нарын тулаанд Карини ердөө 46 секунд тулалдаад өөрийн хүсэлтээр тэмцээнээ өндөрлүүлсэн юм.
Үүний дараа цахим сүлжээнд Иман Хэлифтэй холбоотой олон маргаан өрнөсөн. Энэ үеэр Ж.К.Роулинг Хелифийг "Толгой руу нь цохьсон эмэгтэйнхээ зовлонг өөрөө эдэлж байна" гэсэн бол Илон Маск "Эрчүүд эмэгтэйчүүдийн спортод байх ёсгүй" хэмээн бичсэн аж.
Парисын прокурорын газар лхагва гарагт Хелифийн гомдлын дагуу цахим дээрэлхлийн хэргийг шалгаж эхэлсэн гэдгээ AFP агентлагт мэдэгджээ.
Гэхдээ Францын эрүүгийн хуулийн дагуу Францын нутаг дэвсгэрт гэмт хэрэг үйлдсэн этгээдүүдэд л ял оногдуулах учир тэднийг яллах магадлал тун бага гэв.
Иман Хелиф өнгөрсөн жилийн Дэлхийн аварга шалгаруулах тэмцээнд тестостероны хэмжээ өндөр гэсэн шалтгаанаар оролцох эрхгүй болж байв.
Харин энэ удаагийн олимпод оролцох эрхийг нь Олон улсын олимпын хорооноос өгсөн. Тэрбээр 66 кг-ийн жинд өрсөлдөн алтан медаль хүртсэн юм.
