Өнгөрсөн зургаадугаар сард болсон УИХ-ын сонгуулийн сурталчилгааны үеэр Өвөрхангай аймгийн Сант суманд хүн амины ноцтой хэрэг гарсан байдаг. Тодруулбал, Батлан хамгаалахын сайд асан Ч.Сайханбаярын сурталчилгаанд ажиллаж байсан ухуулагч нь тус сумын АН-ын дарга Б.Баянмөнхийг зодож амийг нь хөнөөсөн юм.
Тэгвэл Өвөрхангай аймгийн сум дундын Эрүүгийн хэргийн анхан шатны шүүх тус хэргийн урьдчилсан хэлэлцүүлгийг өнгөрсөн аравдугаар сард хийж, ухуулагчаар ажиллаж байсан П.Отгонбаатарыг Б.Баянмөнх агсны амь насыг хөнөөсөн гэж гэм буруутайд тооцон хэргийн шүүхэд шилжүүлсэн аж.
П.Отгонбаатарт прокурорын байгууллагаас яллах дүгнэлт үйлдэн шүүхэд шилжүүлж, шүүх хурлыг энэ сарын 12 буюу ирэх мягмар гарагт товложээ. П.Отгонбаатарыг Эрүүгийн хуулийн 10.1.2.9-д "Эрхэлж байгаа ажил, албан үүрэгтэй нь холбогдуулж өөрийг нь, түүний ойр дотны хүнийг алах", мөн хуулийн 10.1.2.14-д "Үзэл бодол, арьсны өнгө, үндэс, угсаа, шашин шүтлэг, бэлгийн, хүйсийн чиг баримжаагаар нь үзэн ядаж алсан" гэх зүйл ангиар яллагдагчаар татжээ.
Хэрэв шүүхээс П.Отгонбаатарыг гэм буруутайд тооцвол 12-20 жил хүртэл хугацаагаар, эсхүл бүх насаар нь хорих ял шийтгэх аж.
