Монголбанк, Санхүү эдийн засгийн их сургууль, Санхүүгийн зохицуулах хороо хамтран “Эдийн засаг, санхүүгийн нэр томьёоны тайлбар толь”-ийг шинэчлэх ажлыг эхлүүлжээ.
Энэ ажил бүрэн дуусаж, toli.mongolbank.mn цахим хуудсыг 2024.11.01-нд олон нийтийн хүртээл болгожээ. Монгол Улсад орчин цагийн банкны тогтолцоо үүсэж, бэхэжсэний 100 жилийн ой, СЭЗИС-ийн 100 жилийн ой, Үнэт цаасны хороо буюу одоогийн Санхүүгийн зохицуулах хороо байгуулагдсаны 30 жилийн ойг тус тус тохиолдуулан толийг шинэчилжээ.
Шинэ тайлбар толь 11 бүлэг, 3700 орчим монгол, англи нэр томьёоны тайлбараас бүрдсэн. Монголбанк, СЗХ, СЭЗИС-ийн 37 эрдэмтэн багш, судлаач, салбарын мэргэжилтнүүд хамтран, зургаан сарын хугацаанд хийжээ.
Нэр томьёоны тайлбар толь нь мэргэжлийн хэллэгүүдийн ойлголтын зөрүүг арилгаж, цаашид эдийн засаг, санхүүгийн зохицуулалтын баримт бичиг, гэрээ хэлцэл, сургалт, судалгаанд нэр томьёог нэг утгаар ойлгох, ашиглах боломжийг бүрдүүлснээрээ ач холбогдолтой. Тайлбар толь бичгийн онцлог:
•Нийт 11 бүлгийн 3700 орчим монгол, англи нэр томьёо, түүний тайлбарыг багтаасан,
• Хэзээ ч, хаанаас ч цахим хэлбэрээр хандах боломжийг бүрдүүлсэн,
• Шинэ үг нэмэх, үгийн орчуулга, тайлбарт санал өгөх, зах зээлд ашиглагдах нэр томьёог шинээр нэмж оруулах боломжтой. Цахим толийг "Санхүүгийн боловсрол" аппликейшнд тусгай хэсэг болгон нэмэх ба хэвлэмэл ном хэлбэрээр тун удахгүй олон нийтийн хүртээл болгоно.
Уг тайлбар толь бичгийг Дэлхийн банкны “Олон салбарыг хамарсан техник туслалцааны төсөл”-ийн хүрээнд Монголбанкны Хяналт шалгалтын газраас санаачлан дөрвөн бүлгийн 1300 орчим үгтэйгээр 2015 онд анхлан гаргажээ.
