Хувийн эмнэлгүүдэд олгодог ЭМД-ийн мөнгөнөөс хувь авдаг байсан байж болзошгүй гэх үндэслэлээр ЭМДЕГ-ын дарга Л.Бямбасүрэн, Номинсувд нарыг АТГ-аас энэ сарын 16-ны өдөр баривчлан саатуулаад байгаа. Гэтэл энэ хэрэгт анх сэжиглэгдэн шалгагдаж байсан ЭМДЕГ-ын нэхэмжлэлийн хэлтсийн дарга А.Төвшин гэх эмэгтэй сул чөлөөтэй явж байгаа нь энэхүү хэргийг улс төрийн захиалгатай гэх хардагдахад хүргээд байна. Учир нь А.Төвшин 120 сая төгрөгийн авилга авснаа хүлээсэн гэх бөгөөд АТГ-ынхан энэ хэрэгт ЭМДЕГ-ын дарга Л.Бямбасүрэнг холбогдуулан барьж хорихдоо А.Төвшингийн мэдүүлгийг үндэслэсэн нь анхаарал татахгүй байхын аргагүй юм. Эх сурвалжуудын мэдээлж буйгаар А.Төвшин нь энэхүү үйл явдал болохоос өмнө байцаагдан шалгагдаж байсан гэх бөгөөд тэрбээр “Л.Бямбасүрэн даргынхаа машинд 50 сая төгрөг үлдээж буусан” хэмээн мэдүүлсэн байдаг аж.
ФОКУСЛАВАЛ:
А.Төвшин нь ЭМДЕГ-ын нэхэмжлэл хариуцсан хэлтсийн даргаар ирэхээсээ өмнө “Мөнхийн тун” ХХК-ийн дэд захирал, Мэргэжлийн хяналтын газарт ажиллаж байсан нэгэн аж. Түүнийг сүүлийн үед илт мэдэгдэхүйц хөрөнгөжсөн гэх мэдээлэл байна.
Өнгөрсөн хавар болсон “Эмийн сонсгол”-ын үеэр Эрүүл мэндийн сайд асан, дэд сайд С.Энхболдыг “Мөнхийн тун” ХХК-тэй ашиг сонирхлын холбоотой хэмээн зарлаж байсан. Гэтэл энэ ЭМД-ын авилгын хэрэг дээр энэ компанийн дэд захирал асан А.Төвшин холбогдож улмаар С.Энхболдын сонирхож байгаа албан тушаал болох ЭМДЕГ-ын даргыг матаж, цагдан хориулж үүнийгээ хэвлэлүүдээр цацуулж дуулиан болгосон нь улс төрийн зорилготой хэмээн ярьцгааж байна.
Ажилтан албан хаагчдынх нь бурууг даргад нь тохож хамтатгаад, нийгэм даяар яллуулчихаад албан тушаалыг нь булааж авдаг технологийг хүмүүс мэддэг болчихсон. Нэгэнт дуулиан үүсгэж цагдан хорьсон бол ямар нэгэн хэрэг үүрүүлээд яллахыг оролддог улс төрийн энэ технологийг Хөгжлийн банк, Нүүрсний хэрэг, Ногоон автобусны гээд хэргүүдээс харж болно. Нэгэнт цагдан хорьсон бол ямар нэгэн хэрэг хүлээлгээд ялладаг хэлмэгдүүлэлтээ хуулийнхан “ёлкны мод” гэж нэрлэдэг талаар ярьдаг. Үүн шиг ЭМДЕГ-ын авилгын гэх хэрэгт даргаар нь туг тахиж нийгэмд дуулиан тарихыг оролдсон ч гол “авилгач” нь эхнээсээ ийнхүү даравч ил гарч эхлээд байна.
Үүнтэй холбогдуулан сануулахад Эрүүл мэндийн сайд асан С.Энхболдыг АТГ-аас шалгаад 2-3 жил болж буй. Авилга, албан тушаалын гэх хэргийг нь “боосон” гэх атлаа өнөөдрийг хүртэл хав дарж байгаа гэх яриа улстөрчид дунд бий. Энэ хэрэг юу болсон юм бол?
