Удирдлагын академийн Төрийн захиргааны тэнхимийн багш, судлаачид “Төрийн захиргаа” хэмээх шинэ бүтээл туурвиж нээлтээ хийжээ. Номын нээлтэд зохиогчид, төрийн байгууллагын төлөөлөл, их, дээд сургуулийн эрдэмтэн, багш нар, олон улсын байгууллагын төлөөлөгчид, Удирдлагын академийн багш, судлаачид, магистрант, докторантууд, төрийн албан хаагчид болон хэвлэл мэдээллийн байгууллагын төлөөлөл өргөнөөр оролцов.
Энэхүү бүтээлийг боловсруулахад Удирдлагын академийн 20 гаруй эрдэмтэн, судлаач оролцсон бөгөөд уг бүтээлд захиргааны шинжлэх ухааны онол, практикийн асуудлуудыг системтэйгээр тусгаснаас гадна Монголын төрийн захиргааны онцлог, түүхэн замнал, орчин цагийн төрийн захиргааны тулгамдсан асуудлыг хамарсан нийт 12 бүлэгтэй ажээ. Тодруулбал, бүтээлийн агуулгад төрийн захиргааны шинжлэх ухааны үүсэл, хөгжил, олон улсын туршлага, Монголын төр, захиргааны түүхэн уламжлал, өнөөгийн тогтолцоо, бодлого боловсруулах болон хэрэгжүүлэх үйл явц, хүний нөөцийн удирдлага, төрийн үйлчилгээ, төрийн санхүү, төрийн албаны ёс зүй, төрийн захиргааны шинэтгэл, судалгааны орчин үеийн чиг хандлага зэрэг өргөн хүрээний асуудлыг хамруулжээ.
Түүнчлэн төрийн захиргааны асуудлыг судалгаа, кейс, жишээ, баримт нотолгоонд тулгуурлан тайлбарласнаараа судалгаа, сургалтын өндөр ач холбогдолтой бүтээл болсныг зохиогчид болон нээлтэд оролцогчид онцолж байна.
Уг бүтээл нь төрийн захиргааны асуудлыг онол, практикийн түвшинд авч үзэх боломжийг бүрдүүлэхийн зэрэгцээ төрийн бодлого боловсруулагч, улс төрч, төрийн албан хаагчид болон энэ чиглэлээр суралцагч, сонирхон судалдаг хэн бүхэнд хөтөч болно гэдэгт итгэлтэй байна.
Эрхэм уншигч Та бүхэн тус бүтээлийг Удирдлагын академийн Номын сангаас авч судлах боломжтой.
Уншигч таны мэлмий хурц, оюун тунгалаг байж, номын цагаан буян дэлгэрэх болтугай.
Удирдлагын академи
Сэтгэгдэл (0)
Сэтгэгдэл бичигдээгүй байна