Монгол Улсын ДОХ болон Сүрьеэгийн үндэсний хөтөлбөрийн олон улсын хөндлөнгийн үнэлгээнд Баянзүрх дүүргийн Эрүүл мэндийн төвийн Сүрьеэ, ДОХ, БЗДХӨ-ний кабинетууд хамрагдаж байна. Энэ нь Монгол Улсад хэрэгжиж буй ДОХ болон Сүрьеэгийн үндэсний хөтөлбөрүүд нь халдварт өвчний тархалтыг бууруулах, нас баралтыг хязгаарлах, оношилгоо, эмчилгээ, урьдчилан сэргийлэх, тусламж үйлчилгээний хүртээмж, чанарыг сайжруулахад чиглэсэн үндэсний хэмжээний бодлого, стратегийн баримт бичигт тулгуурласан цогц арга хэмжээ юм.
Хөтөлбөрүүдийн хэрэгжилтийн явц, үр дүнг бодитой, хараат бус байдлаар үнэлэх зорилгоор олон улсын хөндлөнгийн үнэлгээг тодорхой давтамжтай зохион байгуулдаг. ДОХ-ын үндэсний хөтөлбөрт 2016 онд 1 удаа, сүрьеэгийн үндэсний хөтөлбөрт 2008, 2013, 2022 онуудад нийт 3 удаа ДЭМБ болон олон улсын хамтарсан хөндлөнгийн үнэлгээ хийгдсэн.
2026 онд Дэлхийн эрүүл мэндийн байгууллага (ДЭМБ)-ын техникийн дэмжлэг, Глобал сангийн дэмжлэгтэйгээр ДОХ, сүрьеэгийн чиглэлээр мэргэшсэн олон улсын 17 зөвлөх, үндэсний зөвлөх, мэргэжилтнүүдээс бүрдсэн баг үндэсний хөтөлбөрүүдэд олон улсын стандартад нийцсэн, цаашдын бодлого, стратегийг тодорхойлох, санхүүжилтийн асуудлыг шийдвэрлэхэд нотолгоонд суурилсан үндэслэл боловсруулахаар хөндлөнгийн хяналт, үнэлгээг хийн ажиллаж байна.
