Монголын морин спорт, уяачдын холбоо /ММСУХ/ нь 30 жилийнхээ ойн хүрээнд зохион байгуулсан сагсан бөмбөгийн нөхөрсөг тэмцээнд оролцсон уяачид маань тэмцээний үеэр босгосон хандивын мөнгөө сайн үйлд зориулахаар шийдвэрлэж, ЭХЭМҮТ-ийн хүүхдийн эрчимт эмчилгээ болон мэдээгүйжүүлэх хагалгааны тасгуудыг шаардлагатай тоног төхөөрөмжөөр хангалаа.
Тодруулбал дуслын шахуурга, отсос, утлагын аппарат, сувилагчийн тэргэнцэр, яаралтай тусламжийн цүнх, хүүхдийн хяналтын монитор, pulse oximeter rad-G гэх мэт нэн яаралтай тусламжийн 20 орчим сая төгрөгийн тоног төхөөрөмжийг ММСУХ-ны ерөнхийлөгч тод манлай уяач Д.Дагвадорж, ерөнхий нарийн бичгийн дарга Ц.Ганбаяр, Сэлэнгэ аймгийн харьяат Монгол Улсын манлай уяач Б.Эрдэнэгэрэл нар өнөөдөр эмнэлгийн удирдлагуудад гардуулан өгсөн юм.
ММСУХ нь томоохон уралдаан, арга хэмжээнүүдийнхээ дараа хүүхэд болон хүүхдийн байгууллагад чиглэсэн хандивын ажлыг шат дараатай зохион байгуулдаг бөгөөд ЭХЭМҮТ-д энэ удаа хүлээлгэн өгсөн тоног төхөөрөмж нь анхных бус юм. Энэ удаагийн хандив маань ханиад томууны яг энэ ачаалалтай оргил үед нүдээ олсон, маш том дэмжлэг болж буйг эмч удирдлагууд онцолж байлаа. Бид цаашдаа энэ мэтчилэн хүүхдийн төлөөх үйлсэд бүх талаараа хамтарч, дэмжиж ажиллахад нээлттэй юм.
