ЭМДЕГ-ын дарга Ц.Батбаатар болон холбогдох газар, хэлтсийн удирдлагууд НЭМГ-ын дарга Н.Наранбаатартай уулзаж, Эрүүл мэндийн даатгалын тухай хууль болон ЭМДҮЗ-ийн тогтоолуудын хэрэгжилтийг сайжруулах, эрүүл мэндийн тусламж, үйлчилгээ худалдан авах гэрээний биелэлтийг хангах, хамтарсан хяналт шалгалт хийх чиглэлээр хамтран ажиллах санал солилцлоо.
Уулзалтын үеэр гэмт хэргийн улмаас эрүүл мэнд нь хохирсон даатгуулагчдын зардлыг буруутай этгээдээр төлүүлж, даатгалын санг хохиролгүй болгох үйл ажиллагаанд эрүүл мэндийн байгууллагуудын оролцоог нэмэгдүүлэх, нэхэмжлэлийн хяналтаар илэрч буй хасагдлын шалтгаанд дүн шинжилгээ, судалгаа хийж, харьяа байгууллагуудыг нэгдсэн мэдээлэл, зөвлөмжөөр хангаж ажиллах, тусламж, үйлчилгээний төрөл, орны тоо зэрэг мэдээллийг стандартчилах, мэдээлэл солилцоог сайжруулах, хяналт шалгалтаар илэрдэг нийтлэг зөрчлүүдийг арилгах чиглэлээр хамтран ажиллаж, сургалт болон мэргэжил-арга зүйн дэмжлэг үзүүлэхэд хамтран ажиллахаар боллоо.
Мөн НЭМГ-ын харьяа эрүүл мэндийн байгууллагуудын тусламж, үйлчилгээний чанар, стандартын хэрэгжилтэд хяналт тавих, хоёр байгууллагын мэдээллийн солилцоог сайжруулах зорилгоор хамтарсан ажлын хэсэг байгуулахаар тохиролцов. Уг ажлын хэсэг нь тулгамдсан асуудлуудыг шуурхай шийдвэрлэж, салбарын үйл ажиллагааны уялдааг сайжруулах чиглэлээр тогтмол хамтран ажиллаж, бодлогын нэгдсэн уялдааг хангаж ажиллах юм.
