УИХ-ын гишүүн, Оюутолгойн асуудлаарх хянан шалгах түр хорооны дарга О.Батнайрамдал Хянан шалгах түр хороо байгуулагдан ажилласнаас хойш түүнийг үл таних этгээдүүд хуурамч улсын дугаартай, бүртгэлгүй автомашинууд ашиглан мөрдсөн тухай өнөөдөр хэвлэлүүдэд ярьсан.
Тэгвэл энэ асуудлаараа Эрүүгийн цагдаагийн албанд ханджээ. Тэрбээр цахим хуудаснаа "Оюутолгойн Хянан шалгах түр хорооны үйл ажиллагаа ид явагдаж байгаа энэ үед сүүлийн хоёр долоо хоногийн турш 5896УЕУ,3602УЕТ, 8592УЕУ, 7406УНК, 2983УАТ, 8643УЕН,7935УНК, 8726УЕА,4829УЕТ дугаар бүхий онцгой шинж тэмдэггүй 9 машин намайг даган, мөрдөн тагнаж байсныг баримтжуулан, Цагдаагийн Ерөнхий газар болон Нийслэлийн авто тээврийн хэрэгслийн бүртгэл, хяналтын төвд хандан шалгуулахаар хүргүүлсэн.
Улмаар нийслэлийн Авто тээврийн хяналтын төвөөс эдгээр бүх машинууд нь улсын БҮРТГЭЛГҮЙ болохыг баталгаажуулж хариу ирүүлсэн нь хянан шалгах үйл ажиллагааг мөрдөн мөшгөж буй үйл ажиллагаа гэж бид ойлгож байна.
Ийнхүү мөрдөн мөшгөж байгаа нь Монгол Улсын Үндсэн хуулийн 16 дугаар зүйл, Хүний эрхийн түгээмэл тунхаглал (3 дугаар зүйл)-д зааснаар “Хүний халдашгүй байдлыг илт зөрчсөн хууль бус үйл ажиллагаа” болох билээ.
Хуулиас гадуур хэнийг ч даган мөрдөж мөшгөж болохгүй. Энэ үйлдэл нь хувь хүний халдашгүй байдал төдийгүй Монгол Улсын Парламентын халдашгүй байдал, хэвийн үйл ажиллагаанд халдсан ноцтой үйлдэл гэж ойлгогдож байна. Мөн Хянан шалгах үйл ажиллагаанд хөндлөнгөөс нөлөөлөх гэж оролдсон үйлдэл гэж үзэхээс аргагүйд бид хүрч байна.
Уг асуудлыг шалгуулахаар холбогдох байгууллагуудад хандсан бөгөөд УИХ дахь Тусгай хяналтын дэд хороо болон Халдашгүй байдлын дэд хороо, Хүний эрхийн үндэсний коммист албан ёсоор хандах болно.
Хуулийн байгууллагаас ирүүлсэн хариу бүрийг цаг тухайд нь мэдэгдэх болно.
Улс төрийн үйл явдал ихтэй энэ үед Оюутолгойн асуудал дээр шийдэл гарч, эцэслэгдтэл Хянан шалгах түр хороотой хамтдаа байж, анхаарлаа бүү сатааруулаарай гэж Та бүхнээсээ хүсье” гэв
