УИХ-ын дарга Д.Амарбаясгаланг албан тушаалаас нь огцруулах шаардлагад зарим гишүүд гарын үсэг зурсан хэмээн сошиалаар яригдаж байна. Гэвч УИХ-ын даргын нэр холбогдоод байгаа асуудалд зөвхөн ёс зүйн манлайлал үзүүлж, ёс зүйн хувьд хариуцлага ярих тухай гишүүдээс гарын үсэг авсан. Харин УИХ-ын даргын суудлаас нь огцруулах тухайд гарын үсэг зураагүй, үүнийг нь хүлээн зөвшөөрөхгүй гэдгээ УИХ-ын гишүүд мэдэгдэж эхэллээ.
Тухайлбал, УИХ-ын гишүүн Б.Мөнхсоёл “УИХ-ын даргад ёс зүйн хариуцлага тооцох шаардлагад би нэгдэж гарын үсэг зурсан. Гэтэл УИХ-ын даргыг огцруулах бичиг болон өөрчлөгдөж гарын үсэг зуруулах процесс эхэлж буй юм байна. Миний хувьд үүнд нэгдэхгүй. Учир нь шүүхээр эцэслэн шийдэгдээгүй байхад хэнийг ч хэлмэгдүүлж болохгүй” гэж мэдэгджээ.
УИХ-ын дарга бол Монгол Улсын үндэсний аюулгүй байдал, эв нэгдлийг илэрхийлэгч байдаг нэр төдий албан тушаал биш учраас хариуцлагатай хандах, шүүхээр эцэслэн шийдэгдээгүй, баримтгүй асуудалд УИХ-ын дарга Д.Амарбаясгаланг холбохгүй байхыг зарим гишүүд хэлж байна.
