Хөнгөн атлетикийн ахмад мастеруудын Дэлхийн хошой аварга, дэлхийн дээд амжилтыг эзэмшигч МУГТ Цэрэнгийн Раднааг фокуслаж байна
Тэрээр 1934.04.25-нд Өмнөговь аймагт төрсөн. Зоотехникч мэргэжилтэй 28 нас хүртлээ уг мэргэжлээрээр ажиллаж байжээ. Түүний гэргийг А.Пүрэв гэдэг. Тэд дундаасаа 10 сайхан хүүхдийн аав ээж ажээ.
Ц.Раднаа гуай 1962 онд Биеийн тамирын дээд сургуульд орсноос хойш спорттой амьдралаа холбож, 1966 оноос буюу сургуулиа төгсөөд хөнгөн атлетик, тэр дундаа ойрын болон дундын зайн гүйлтээр мэргэжлийн түвшинд хичээллэж, уралдаан, тэмцээнд оролцох болжээ.
2019 онд 85 настайдаа Бүгд Найрамдах Польш Улсад болсон хөнгөн атлетикийн Дэлхийн аварга шалгаруулах тэмцээнд гурван алтан медаль хүртэж, нэг дээд амжилт тогтоосон анхны монгол хүн юм.
Өнгөрсөн жил Швед улсын Готенбург хотод болсон ДАШТ-ий 90-95 насныхны 100, 200, 400, 800, 1500 болон уртын харайлтын төрөл гээд нийт 6 алтан медаль хүртэж байсан билээ.
Тэрээр дараагийн зорилго нь Мастеруудын дэлхий аварга хэмээн ярьж байсан бол түүнийгээ хэдийн биелүүлж, АНУ-ын Флоридад болсон 2025 оны Мастеруудын дэлхий аваргаас зургаан алтан медальтай эх орондоо ирлээ.
Раднаа гуай долоо хоногийн амралтын хоёр өдрөөс бусад өдөр тасралтгүй бэлтгэл сургуулилт хийдэг тухай хуучилна. Түүний дараагийн зорилго нь 2028 онд болох ахмадуудын олимпын наадам юм.
Түүний амьдралын түүхээр хийгдсэн “Цагаан зээрийн янзага” баримтат кино өнгөрсөн оны 11 дүгээр сард гарсан. Цагаан зээрийн янзага бол түүний бага насны хоч юм.
Бага балчраасаа хонь хариулан Говь нутгийн хайрга чулуутай, хатуу хөрсөн дээр хөлөө эвэрштэл хөл нүцгэн гүйж явсан бяцхан хүүгийн мөрөөдлийн биелэл, монгол өвөөгийн хөнгөн атлетикаар 57 жилийн турш хичээллэсний үр дүнд олж авсан, тууштай, цуцашгүй хичээл зүтгэлийн шагналыг уг кино өгүүлэх аж.
90 насандаа дэлхийн дээд амжилтуудыг эвдэж, Монгол хүний хат, онцлог, чадварыг харуулж залууст үлгэр дуурайлал болж, биширмээр амжилтыг үзүүлж яваа МУГТ Ц.Раднаа гуайдаа эрүүл энх байж дараагийн зорилгодоо хүрэхийг хүсэн ерөөе.
