Монгол Улсын Гавьяат тамирчин цол хүртсэн Шатрын болон шатрын бодлого бодолтын Ази тивийн анхны Их мастер Сумьяагийн Билгүүн сэтгэгдлээ ийнхүү хуваалцжээ.
- 64 буудал 32 дүрстэй хөлөгт тоглоомтой танилцан нөхөрлөж өглөө, өдөр, оройг үл ажран бэлтгэлээ хийж хавар, намар, зун, өвлийг ялгалгүй тэмцээн уралдаанд оролцож явсаар 22 жилийг ардаа орхижээ.
Энэ хугацаанд бусдаас оройтож унтаж, түрүүлж сэрж, утас компьютерийн тоглоомноос өөрийгөө бүрэн тусгаарлаж, найз нөхөд, хамаатан садантайгаа тоглох цагаа хумсалж шатар хэмээх гайхалтай спортод өөрийгөө бүрэн дайчилж Шатрын болон шатрын бодлого бодолтын Их мастер цолыг давхар хүртжээ.
Өнөөдрийг хүртэлх шатрын маань замнал тийм дардан байгаагүй ч сайн аав ээжийн хүчинд үргэлж толгой өөд зорьсон зорилгынхоо төлөө хичээж ирсэн бөгөөд "Монгол улсын гавьяат тамирчин" хэмээх эрхэм хүндтэй шагналыг авахад хамгийн том нөлөөг үзүүлсэн аав ээждээ хайртайгаа хэлэхийг хүсэж байна
Шатар анхлан заасан Мягмардорж багш, хамгийн чухал суурийг нь цутгаж өгсөн Дамдин багш, шатрыг спорт гэдгийг ойлгуулж өгсөн Лхагвасүрэн багш, мэргэжлийн тамирчин болгож өгсөн Шаравдорж багшдаа болон тухай бүрт нь тусалж дэмжиж зааж сургаж байсан Эрдэнэдорж, Ганбаатар, Болдбаатар, Конопка багш нартаа баярлалаа.
Тамирчин хүний амьдрал санхүүгийн сорилт бэрхшээлтэй тогтмол тулгарч байдаг бөгөөд энэ хүртэл дэмжиж ирсэн "Алдар" спорт хороо, "Сүлд" спорт хороо, ABChess шатрын академи, Монголын шатрын холбоо, Үндэсний шигшээ баг болон хувь хүн, албан байгууллага, найзууд, аав ээжийн найз нөхөд, хамаатан садан та бүхэндээ талархаж байгаагаа илэрхийлье. Та бүхэнгүйгээр өнөөдрийн энэ амжилтыг үзүүлэх боломжгүй байсан юм шүү.
Гавьяат тамирчин цолыг авлаа гээд ханаж тайвшрахгүйгээр өөрийгөө улам дайчлан Монгол улсынхаа нэрийг олон улс, тив, дэлхийд дуурсган мандуулахыг хичээхээ амлаж байна. Би өөрийн бэлтгэл сургуулилтыг шамдан хийхээс гадна залуу үеийн дүү нартаа зөвлөж, өсвөр үеийн шавь нартаа зааж сургаж Монгол улсдаа шатрын спортыг хөгжүүлж, түгээн дэлгэрүүлэх болно
Сэтгэгдэл (0)
Сэтгэгдэл бичигдээгүй байна