Гэр бүл, хөдөлмөр, нийгмийн хамгааллын яам, Үндэсний статистикийн хороо, НҮБ-ын Эдийн засаг, нийгмийн комисс хамтраад "Өгөгдлийн хүч: Ажлын байр ба Нийгмийн хамгаалал” сэдэвт хэлэлцүүлэг өрнүүлжээ.
Хэлэлцүүлэгт Гэр бүл, хөдөлмөр, нийгмийн хамгааллын яамны Төрийн нарийн бичгийн дарга Л.Мөнхзул, Үндэсний статистикийн хорооны дарга Б.Батдаваа, Монгол Улс дахь НҮБ-ын суурин зохицуулагч Яап Ван Хиерден нар оролцлоо.
Монгол Улс "Алсын Хараа 2050" урт хугацааны хөгжлийн бодлогодоо Хүний Хөгжлийг тэргүүлэх чиглэлээ болгон тунхагласан.
Үүнд ажлын байрны хүртээмжийг нэмэгдүүлж, иргэдийн амьдралын чанарыг дээшлүүлж, ядуурлыг 50 хувь бууруулах зорилт тавин ажиллаж байна.
* Гэр бүл, хөдөлмөр, нийгмийн хамгааллын яамнаас хөдөлмөрийн зах зээлийн шинэчлэлийг эхлүүлж, эдийн засгийн өсөлтийг дэмжсэн, эрэлтэд нийцсэн мэргэжилтэй ажиллах хүчийг бэлтгэх
* Цаг уурын өөрчлөлтөөс үүдэн эдийн засгийн хүнд нөхцөлд орох магадлалтай малчдыг эмзэг бүлэгт өртөх эрсдэлийг бууруулах, тэтгэмжийг илүү оновчтой, цаг алдалгүй хүргэх буюу “Дасан зохицох нийгмийн хамгаалал”-ын үйлчилгээг бүрдүүлэх
Мөн залуу гэр бүл, орлого багатай иргэдэд боломжит үнэтэй орон сууцны хүртээмжийг нэмэгдүүлэх чиглэлээр тодорхой зорилт тавин ажиллаж байна.
Хөрөнгө оруулалтын хэмжээгээр бус, бодит үр дүнгээр хэмжиж, нийт хүн амд бус, "Хэнийг ч орхигдуулахгүй" зарчмаар хамгийн эмзэг, зорилтот бүлэгтээ хүрч ажиллах нь чухал юм. Үүний тулд нэгдсэн, бодит цагийн, нарийвчилсан өгөгдөл шаардлагатай байгаа юм. Сүүлийн жилүүдэд олон улсын байгууллагуудтай хамтран Засгийн газрын мэдээллийн сангуудыг нэгтгэх эхний алхмуудыг хийж, нэгдмэл, цахим удирдлага руу шилжихээр ажиллаж байгааг Гэр бүл, хөдөлмөр, нийгмийн хамгааллын яамнаас танилцууллаа.
