Дэлхийн дулаарал, уур амьсгалын өөрчлөлтөөс үүдэн Өмнөд Азийн орнуудын үер, ган, хар салхи, агаарын хэт халалт зэрэг цаг уурын аюулт үзэгдлийн давтамж болон эрчим нэмэгдсээр байна. Тухайлбал, Энэтхэгийн Мумбай хотод хүчтэй аадар бороо орсонтой холбогдуулан Энэтхэгийн Цаг уурын алба лхагва гарагт тус хотод аюулаас сэрэмжлүүлэх улаан түвшний түгшүүр зарласан байна. Агаарын тээврийн компаниуд зорчигчдод зориулсан зөвлөмж гаргаж, хотоос явах болон ирэх нислэгүүд саатаж байгааг анхааруулсан байна. Мягмар гарагт орсон хүчтэй аадар борооны улмаас Энэтхэгийн санхүүгийн төв зогсонги байдалд орж, Мумбай хотын захын төмөр замын сүлжээ тасалдаж, хотын эргэн тойрны газрууд усанд автаж, тав дахь өдрөө дараалан орсон аадар борооны дараа хүмүүс үерт автсан гудамжаар ус туулан явахад хүрчээ. Аадар борооны улмаас зургаан хүн амиа алдсан байна. Цаг уурын албаны мэдээллээр, хотын зарим хэсэгт мягмар гаргийн өглөөний 8:30 цагаас лхагва гаргийн 8:00 цагийн хооронд 200 мм хур тунадас унажээ. Түүнчлэн Мумбайгаас 80 км зайд орших Матеран хотод 382.5 мм хур тунадас унасан байна.
Түүнчлэн энэ сард Энэтхэгийн Уттаракханд мужид орсон их хэмжээний борооны улмаас тус мужийн нэгэн тосгон бүхэлдээ үерт автсан байна. Энэтхэгийн баруун хойд бүс нутгаар цутгах хур тунадасны хэмжээ жилийн дундаж түвшнээс 12 хувиар их байгаа ба аюулт үзэгдлүүдийн улмаас амиа алдах хүний тоо цаашид нэмэгдэх төлөвтэй байгааг мөн тус улсын Цаг уурын албанаас анхааруулсан байна. Үүнээс гадна хүн амын даац хэтэрсэн үед хот төлөвлөлт тааруу байгаагийн зэрэгцээ бохир ус зайлуулах систем гээд дэд бүтцийн зохион байгуулалт хангалтгүй байгаа зэрэг олон жил яригдаж буй асуудлууд нөхцөл байдлыг хурцатгаж байгааг БНЭУ-ын Засгийн газар тодотгосон байна
ЭХ сурвалжилж: https://www.nytimes.com/2025/08/20/world/asia/india-monsoon-mumbai.html
