Баянзүрх дүүрэгт өнөөдөр 450 мянган иргэн амьдарч, ажилладаг нийслэлийн хамгийн том дүүрэг. Хүн ам ихтэйгээс гадна тус дүүрэгт Батлан хамгаалах яам, түүний харьяа салбар нэгж, байгууллагууд байрладаг.
Үүнтэй холбогдуулан Баянзүрх дүүргийн Засаг дарга Г.Жаргалсайхан өнөөдөр Батлан хамгаалахын сайд Д.Батлуттай уулзах үеэрээ Батлан хамгаалах яам болон Баянзүрх дүүргийн хамтын ажиллагаа, цаашид өргөжүүлэх боломжийн талаар санал солилцжээ. Нэн тэргүүнд БХЯ-ны харьяа Цэргийн төв эмнэлгийг Баянзүрх дүүргийн иргэдэд нээлттэй болгох, Цэргийн төв эмнэлгийн хуучин болон шинэ байрыг холбосон хүзүүвч барилга барих асуудлаар хоёр тал зөвшилцсөн байна. Ингэснээр Баянзүрх дүүргийн 400,000 гаруй иргэн Цэргийн төв эмнэлгийн мэргэшсэн тусламж үйлчилгээ авах боломжтой болж, яаралтай тусламжийн хүртээмж нэмэгдэж, ачаалал ихтэй бусад улсын эмнэлгүүдийн ачаалал буурах зэрэг олон талын эерэг үр дүн гарах юм.
