Нийслэлийн Засаг даргын нэгдүгээр орлогч Т.Даваадалай болон холбогдох албаныхан Налайх дүүрэгт ажиллаж, тулгамдаж буй асуудал болон хэрэгжиж буй ажлуудынх нь талаар дүүргийн удирдлагуудтай зөвшилцлөө. Налайх дүүрэг Улаанбаатар хотын төвөөс зүүн хэсэгт 36 километрийн зайд оршдог. Налайхын нүүрсний уурхайд түшиглэн Улаанбаатар хотыг нүүрсээр хангах зориулалтаар үүсэж хөгжсөн. Нийт 40 гаруй мянган хүн амтай ч албан бусаар 90 орчим мянган хүн суурьшсан. Найман хороотой. Эдийн засгийн тусгай бүс, аж үйлдвэр, технологийн парктай. Улаанбаатар хот руу баруун талаас ирэх ачааллыг хуваалцах үйлдвэрлэлийн дагуул хот болж хөгжиж байгааг НЗД-ын нэгдүгээр орлогч Т.Даваадалай онцоллоо.
Харин Налайх дүүргийн Засаг дарга Д.Наянбаяр “Уул уурхайг түшиглэн ажилчдын дүүрэг болж үүсэн хөгжиж буй Налайх дүүрэг нь алслагдсан гурван дүүргээс Улаанбаатар хотод хамгийн ойр оршдог. Бидний хувьд дэд бүтцийн асуудлууд тулгамдаж, анхаарч ажиллаж байна. Тухайлбал, манай дулааны станц 69 МВт хүчин чадалтай боловч үндсэн хүчин чадалдаа хүрч чаддаггүй, нэг зуух асуудалтай буюу өвлийн улиралд эрчим хүч, дэд бүтцийн асуудал тулгардаг. Дараагийн ээлжид Налайх дүүрэгт “10 шар” гэж нэрлэдэг хуучны буюу 1980-аад оны байрнуудад инженерийн шугам сүлжээ, дэд бүтцийн асуудал орхигдсон” гэдгийг тодотголоо. Энэ үеэр НЗД-ын нэгдүгээр орлогч Т.Даваадалай “1980-аад оны барилгуудад сонгон шалгаруулалт явуулж, шинэ орон сууц барих боломжийг холбогдох хуулийн хүрээнд судлах хэрэгтэй” гэв.
Налайх дүүргийн нутаг дэвсгэрт байрладаг аж үйлдвэр, технологийн парктай холбогдуулан 32 МВт эрчим хүчний станцыг улсын комисст хүлээлгэн өгөхөөр бэлтгэж буйг тус дүүргийн Засаг дарга Д.Наянбаяр онцлов. Энэ хүрээнд усны асуудлаа шийдэж, цэвэрлэх байгууламжийн ТЭЗҮ-ийг гаргаад байна. Эрчим хүч, дулааны асуудлыг бүрэн шийдчихвэл Улаанбаатар хотоос хүнд, хөнгөн үйлдвэрүүдийг Налайх дүүрэг рүү шилжүүлэх ажлыг хэрэгжүүлэх ч боломж байгаа зэрэг асуудлыг хэлэлцэж, санал солилцлоо.
Түүнчлэн Налайх дүүрэгт НОСК-иас орон сууцны төслүүд хэрэгжүүлж байна. Япон улсын “Өвсний үндэс” төслийн буцалтгүй тусламжаар цэцэрлэгийн өргөтгөл, Герман, Монголын олон улсын технологийн сургуулийн өргөтгөлийн барилга баригдсан. Энэ хэсэгт авто замын бүтээн байгуулалт явагдаж байгаа боловч холбоос замыг гүйцээхэд санхүүжилт тулгамдаж байгаа учраас ажлыг бүрэн дуусгаж өгөхөд туслалцаа үзүүлэх хүсэлтийг НЗД-ын нэгдүгээр орлогч Т.Даваадалайд Налайх дүүргийн Засаг дарга Д.Наянбаяр уламжиллаа. Мөн Хот, тосгоны эрх зүйн байдлын тухай хууль шинэчлэгдсэн нь дүүргүүдэд бие даах бололцоо олгож байгаад талархалтай байгаагаа Налайх дүүргийн Засаг дарга илэрхийлсэн юм.
