УИХ-ын Эдийн засгийн байнгын хорооны өнөөдрийн \2025.06.17\ хуралдаанаар Стандартчилал, техникийн зохицуулалт, тохирлын үнэлгээний итгэмжлэлийн тухай хуулийн шинэчилсэн найруулгын төслийг хэлэлцэн дэмжиж, УИХ-ын нэгдсэн чуулганаар хэлэлцүүлэхээр боллоо.
Хуулийн төсөл 8 нь бүлэг, 36 зүйлтэй ба иргэн, аж ахуйн нэгж, байгууллага стандартчиллын баримт бичгийг сонгон хэрэглэх зохицуулалтыг өөрчилж, стандартыг иргэн, хуулийн этгээд дагаж мөрдөхөөр заасан. Стандартаар дамжуулан салбарын үйл ажиллагаанд хяналт тавих тогтолцоог бий болгоход хуулийн төслийн гол үзэл баримтлал чиглэсэн.
Хуулийн төсөл батлагдсанаар хүн амын эрүүл, аюулгүй орчинд амьдрах эрх хангагдахын зэрэгцээ стандартыг хэрэглэх, хэрэгжүүлэх тогтолцоо боловсронгуй болж олон улсын нийтлэг жишигт нийцсэнээр дотоодын бүтээгдэхүүн, үйлчилгээний чанар сайжрах юм.
Стандартчилал, техникийн зохицуулалт, тохирлын үнэлгээний итгэмжлэлийн тухай хуулийг боловсронгуй болгох хүрээнд нийт 20,000 орчим оролцогчийг хэлэлцүүлэгт хамруулж, давхардсан тоогоор 17,250 саналыг тусгасан.
Стандарт бол итгэлцэл, эмх цэгц, аюулгүй амьдралын баталгаа, улс орны хөгжлийн хамгийн зөв гарц шийдэл учраас энэхүү хуулийн төслийг хэлэлцэн батлах нь нэн чухал. Өөрөөр хэлбэл, стандартыг хэрэглэж ч болно, хэрэглэхгүй ч байж болно гэсэн ойлголт үгүй болж стандартыг заавал дагаж мөрдөж, цаашид хэвшүүлэх учиртай. Ингэж байж бидний аюулгүй амьдралын баталгаа хангагдах юм.
