Говийн бүсийн зөвлөлийн анхдугаар хуралдаан Дорноговь аймгийн Сайншанд суманд амжилттай болж өндөрлөлөө. Хуралдааныг Монгол Улсын Шадар сайд, Бүсчилсэн хөгжлийн Үндэсний хорооны дарга С.Амарсайхан даргалж, Монгол Улсын Ерөнхий Сайд, УИХ-ын гишүүд, Засгийн газрын гишүүд, төрийн захиргааны байгууллагууд, Говийн бүсийн Говьсүмбэр, Дорноговь, Дундговь, Өмнөговь аймгийн төлөөлөл, бүсийн зөвлөлийн гишүүд, бүсийн аймаг, сумдын бүх шатны төрийн байгууллагын төлөөлөл, хувийн хэвшил, олон улсын байгууллага, эрдэмтэд, иргэдийн төлөөлөл зэрэг нийт 1000 гаруй төлөөлөгчид говийн бүсийн хөгжлийн төлөвлөгөөг хэлэлцлээ.
Монгол Улсын Засгийн газар 2024-2028 оны үйл ажиллагааны хөтөлбөртөө “Бүсчилсэн хөгжлийн бодлого”-ыг тэргүүлэх чиглэлээ болгон тусгасан. Энэ хүрээнд Говийн бүсийг БНХАУ болон Өмнөд Азийн орнуудтай эдийн засгийн харилцааг өргөжүүлж, уул уурхай, говийн унаган байгаль, түүх, соёлын өв, палеонтологийн нөөцөд түшиглэн “Аж үйлдвэрийн төрөлжсөн бүс бөгөөд ногоон эрчим хүчний дэд бүс” болгон хөгжүүлэх юм.
Монгол Улсын нийт хүн амын 6.0 хувь нь говийн бүсэд оршин суудаг. Тус бүс нутгийн ДНБ-ийг бүтцээр нь авч үзвэл хамгийн их хувийг буюу 53.9 хувийг үйлдвэрлэл, 33.8 хувийг үйлчилгээ, 12.3 хувийг хөдөө аж ахуйн салбар эзэлж байна. Мөн тус бүс нутагт нийт үйл ажиллагаа явуулж байгаа аж ахуйн нэгжийн тоо 4400 орчим бөгөөд нийт 8.4 сая толгой малтай. Говийн бүсэд ашигт малтмалын стратегийн томоохон ордууд байрладаг төдийгүй гадаадын шууд хөрөнгө оруулалт, уул уурхай, сэргээгдэх эрчим хүч, ялангуяа нар, салхины эрчим хүчийг хөгжүүлэх асар их нөөц бололцоотой. Мөн байгалийн хосгүй тогтоц, түүх соёлын үнэт дурсгалаараа дотоод, гадаадын жуулчдыг татдаг. Тодруулбал, Говь гурван сайхан уулсын байгалийн цогцолборт газар, палеонтологийн үнэт олдвортой Хэрмэн цав, Цагаан суварга, Дэлхийн энергийн төв гэгддэг Хамарын хийд зэрэг аялал жуулчлалын үнэ цэнтэй газар нутаг энэ бүсэд оршдог. Түүнчлэн логистикийн хувьд говийн бүс нь Монгол Улсыг БНХАУ болон бусад улс руу нэвтрэх гарц болдог. Хилийн боомт, төмөр зам, авто замын дэд бүтэц, тэр дундаа Тавантолгой-Гашуунсухайт чиглэлийн төмөр зам хурдацтай өргөн тэлж байгаа нь экспорт, худалдааг дэмжихэд чухал үүрэг гүйцэтгэнэ гэдгийг хуралдаанд оролцогчид онцолж байлаа.
Говийн бүсэд тээвэр логистик, хот байгуулалт, боомт, соёл, аялал жуулчлал, боловсрол, эрүүл мэнд, эрчим хүч, үйлдвэр, үйлчилгээний зэрэг нийт 38 төсөл, бүтээн байгуулалтыг хэрэгжүүлэхээр төлөвлөжээ. Тухайлбал, Гашуунсухайт, Шивээхүрэн, Ханги боомтын зэрэглэлийг ахиулж, нэвтрүүлэх хүчин чадлыг сайжруулах, Өмнөговь аймагт нүүрс-эрчим хүч болон металлургийн кокс, бусад дагалдах үйлдвэр бүхий үйлдвэрлэл, технологийн парк байгуулах, тус аймгийн нисэх буудлыг 4D ангиллын болгон өргөтгөх, Замын-Үүдийн эдийн засгийн чөлөөт бүсэд барилгын материал, түүхий эдийн импортын хангамж, логистикийн төв зэргийг байгуулна.
