ТАТВАРЫН МӨНГӨӨР МАШИН АВААД ИРГЭДЭД ТҮРЭЭСЛЭНЭ ГЭВ
“Засгийн газрын авто бааз” бол төрийн өмчит үйлдвэрийн газар гэтэл 2,3 тэрбум төгрөгөөр тансаг зэрэглэлийн автомашинууд худалдаж аван, түүнийгээ түрээслэнэ гэх зарыг албан ёстой хуудас дээрээ байршуулжээ.
Тодруулбал, “Засгийн газрын автобааз” ТӨҮГ Седан төрлийн автомашин худалдаж авахаар 2,3 тэрбум төгрөгийн, Автомашины сэлбэг худалдаж авахаар 241 сая төгрөгийн тендер зарлажээ.
Тухайн машинууд 2025 онд үйлдвэрлэгдсэн, таван хүний суудалтай, хар өнгөтэй, гадна толь автомат, жолооч зорчигчийн аюулгүйн дэртэй, арьсан суудлын бүрээстэй, арын хэсэг рүү халуун, хүйтэн үлээдэг гэх мэт тансаг зэрэглэлийн машинууд байх аж.
Том оврын суудлын тэрэг түрээслэх үйлчилгээ дулааны улиралд буюу аялал жуулчлалын саруудад сезон нь ордог гэж хэлж болно. Гэтэл төр нь иймэрхүү үйлчилгээ үзүүлдэг цөөхөн иргэд, албан байгууллагынхаа бизнесийг шахаж, товчхондоо булааж байгаа нь харамсалтай халагламаар. Иргэд ч үүнд бухимдлаа илэрхийлж байна. Төр удахгүй ТҮЦ ажиллуулах вий
Г.Оюунтуяа
