Сар шинийн баяр болохоор мөнгөний эрэлт хэрэгцээ ердийн үеийнхээс эрс нэмэгддэг. Эрэлтийг далимдуулан залилах гэмт хэргийн гаралт өсөөд байна.
Тухайлбал, өөрөө ч мэдээгүй байхад "Ард", "Тус", "Нэт капитал", "Дэвших нэхий" гэх мэтчилэн 5-6 зээлийн аппликэйшнээс зээл авсан тухайгаа хохирогч эмэгтэй ярьж, цахим залилан ямар өндөр түвшинд хүрснийг нотолж өгсөн.
Сүүлийн жилүүдэд залилах гэмт хэргийн дийлэнх хувь нь цахим орчинд бүртгэгдэж байна. Залилагч этгээд цахим орчинд "Зээлийн эрх сэргээнэ, эрх нэмэгдүүлж өгнө" гэдэг зар байршуулан төлбөр мөнгө, хувийн мэдээллийг нь авч, оргон зайлж байна. Мөн иргэд мэдээллийн аюулгүй байдлаа хангахгүйгээр линк холбоос дээр дарж, хувийн мэдээллээ алддаг. Тэр мэдээллээр нь залилагч этгээд санхүүгийн үйлчилгээ авч, боломжит хэмжээгээр олон газраас зээл авч байна. Хэн нэгэн иргэн санхүүгийн эрхийг сэргээх ямар ч боломжгүй гэдгийг Цагдаагийн газраас анхаарууллаа.
