Дархан-Уул аймагт Хууль тогтоомж сурталчлах төв байгууллаа

Монгол Улсын Их Хурал болон түүний Тамгын газрын 2019-2024 оны стратеги төлөвлөгөөнд аймаг, нийслэл, сум, дүүргийн иргэдийн Төлөөлөгчдийн Хурлын дэргэд Улсын Их Хурлын үйл ажиллагааг сурталчлах төв байгуулж, мэдээллийн нэгдсэн сүлжээнд холбон, албан бус боловсролын болон зайны сургалтын арга, хэлбэрээр иргэдэд хууль, эрх зүйн мэдлэг олгох, хууль тогтоомжийг сурталчлах ажлыг үр нөлөөтэй зохион байгуулах, ЕБС-ийн сурагчид, их, дээд сургуулийн оюутан залууст зориулсан Парламентын боловсролын хөтөлбөрийг боловсруулан хэрэгжүүлэх зэрэг бодлогын зорилтуудыг дэвшүүлсэн байдаг. 

Улсын Их Хурлын Тамгын газар энэхүү бодлого, зорилтоо хэрэгжүүлэх ажлыг 2022 оноос эхлүүлж, 2023 оны 5 дугаар сард анхны Хууль тогтоомж сурталчлах төвүүдийг Баянхонгор, Өвөрхангай аймагт нээсэн бол шинэ төвийг Дархан-Уул аймгийн иргэдийн Төлөөлөгчдийн Хурлын дэргэд 2023 оны 8 дугаар сарын 02-ны өдөр байгууллаа. Тус төвийг байгуулахад Засгийн газрын Хэрэг эрхлэх газар, Швейцарын хөгжлийн агентлаг хамтран хэрэгжүүлж буй “Нутгийн өөрөө удирдах байгууллагын институцын чадавхыг бэхжүүлэх нь” дэд төслийн баг хамтран ажилласан юм. 

Дархан-Уул аймгийн Хууль тогтоомж сурталчлах төвийн нээлт Хамтран ажиллах санамж бичигт гарын үсэг зурах үйл ажиллагаагаар эхэлсэн. Төвийн үйл ажиллагааны хэвийн, тасралтгүй байдлыг хангахад талуудын хүлээх эрх, үүргийг тодорхойлж, хууль тогтоомжийн хүрээнд хамтран ажиллахаар Улсын Их Хурлын Ерөнхий нарийн бичгийн дарга, хууль зүйн ухааны доктор Л.Өлзийсайхан, Дархан-Уул аймгийн иргэдийн Төлөөлөгчдийн Хурлын дарга С.Насанбат нар Хамтран ажиллах санамж бичигт гарын үсэг зурлаа.