Элэгний хорт хавдар нь дэлхийд зургаа дахь түгээмэл хавдар бөгөөд өнөөгийн чиг хандлага үргэлжилбэл шинэ тохиолдол жилд 870,000-аас 1.52 саяд хүрнэ гэж Lancet сэтгүүлд нийтлэгдсэн Дэлхийн Хорт Хавдрын Ажиглалтын Төвийн (Global Cancer Observatory) мэдээлэлд дурджээ.
Мөн энэ нь бүх хавдрын дотроос гурав дахь хамгийн олон хүний аминд хүрдэг өвчин бөгөөд 2050 он гэхэд жил бүр 1.37 сая хүний амь насыг авч одохоор байна.
Гэсэн ч элэгний хорт хавдрын гурван тохиолдлын хоёр нь урьдчилан сэргийлэх боломжтой гэж олон улсын мэргэжилтнүүдийн баг хэлжээ.
Эрсдэлт хүчин зүйлүүд нь:
Судалгаанд өгүүлснээр, гепатит B ба C вирус нь 2050 онд ч элэгний хорт хавдрын гол шалтгаан хэвээр байх төлөвтэй байна. Уг судалгаа Дэлхийн Гепатитын Өдрөөр нийтлэгдсэн юм. Гепатит B вирусаас сэргийлэх хамгийн үр дүнтэй арга нь төрсний дараах вакцин боловч вакцинжуулалтын хамрагдалт Африкийн Сахарын өмнөд хэсэг зэрэг буурай орнуудад хангалтгүй хэвээр байна.
Хэрэв энэ байдлыг өөрчлөхгүй бол 2015-2030 оны хооронд гепатит B 17 сая хүний аминд хүрнэ гэж судалгаанд анхааруулжээ. Архины хэрэглээ 2050 он гэхэд элэгний хавдрын нийт тохиолдлын 21 хувийг эзлэх төлөвтэй байгаа нь 2022 оны түвшнээс хоёр нэгж хувиар өссөн үзүүлэлт юм.
Илүүдэл жинтэй холбоотой элгэнд өөх хуримтлагдах MASLD өвчнөөс үүдэлтэй хорт хавдар ч мөн 11 хувьд хүрч нэмэгдэхээр байна гэж судлаачид тооцоолжээ. Энэхүү томоохон судалгаа нь элэгний хорт хавдартай холбоотой бүх нотолгоог нэгтгэж, "дэлхий нийтээр яаралтай арга хэмжээ авах шаардлагатай байгааг" онцолсон гэж зохиогчид нь мэдэгдэв.
Мэргэжилтнүүд АНУ, Европ болон Азийн орнуудад тэр дундаа таргалалт болон чихрийн шижинтэй хүмүүст MASLD өвчний аюулын талаар анхааруулж, олон нийтийн мэдлэгийг нэмэгдүүлэх шаардлагатайг онцлон дурджээ.
0
