Украины зүүн хойд нутаг дахь Оросын зарим цэргийн ангийг амжилттай тараасан гэж ерөнхийлөгч Зеленский мэдэгдлээ. Мөн Украины арми наймдугаар сарын 6-нд Оросын Курск муж руу нэвтэрснээс хойш 1200 гаруй хавтгай дөрвөлжин километр газар нутаг, 93 сууринг эзлэн авсан гэж онцлон тэмдэглэсэн байна. Тэрбээр Бямба гаригт болсон хэвлэлийн бага хурал дээр энэ талаар ярьсан ба Оросын Курск мужид явуулж буй цэргийн ажиллагаа амжилттай болсон гэжээ.
Түүнчлэн, Орос, Украины талууд өнгөрсөн Бямба гаригт 230 олзны цэргүүдээ солилцсон. Ирээдүйд мөн адил үлдсэн олзны цэргүүдийг солилцох магадлал өндөр байгаа талаар Зеленский мэдэгдсэн ба Украины зүүн хойд нутгийн Сумы мужийг Оросын бүслэлтээс урьдчилан сэргийлж чадсан гэжээ.
Үүний харуйд Оросын Белгород мужийн захирагч Украины буудлагын улмаас таван энгийн иргэн амиа алдаж, 12 хүн, түүний дотор гурван хүүхэд шархадсан гэж мэдэгдэв. Түүнчлэн, Украины зүүн нутгийн Донецк мужийн Краматорск хотод “Reuters” агентлагийн сэтгүүлчид халдлагад өртсөн байна. Тус халдлагийг Оросууд үйлдсэн гэж Украин буруутгаж байгаа юм.
