Засгийн газар Зөвшөөрлийн тухай хуульд нэмэлт өөрчлөлт оруулж, спортын бооцоот тааврыг зөвшөөрч, бусад бооцоот таавар, цахим мөрийтэй тоглоомыг бүрэн хориглох хуулийн төслийг яаралтай хэлэлцүүлэхээр болсон.
Мөн "Спортын багийн өмсгөл, зураг, рекламд 1xBet, Melbet болон бусад цахим мөрийтэй тоглоомыг сурталчилсан тохиолдолд эрүүгийн хариуцлага хүлээнэ" хэмээн ЗГХЭГ-ын дарга Н.Учрал цахим хаягаараа мэдэгдсэн. Тэгвэл саяхан монгол улсын шигшээ багт нэгдсэн цахим спортын "The MongolZ” баг эрүүгийн хариуцлага хүлээх үү? гэдэг асуудал олон нийтийн анхаарлыг татаад байна. Учир нь "The MongolZ” баг олон улсын томоохон тэмцээнүүдэд оролцохдоо 1xBet-ийн логотой өмсгөл өмсдөг. Тэгвэл Н.Учрал сайдын яриад байгаа хууль батлагдвал “The Mongolz” ивээн тэтгэгчээсээ болоод эрүүгийн хариуцлага хүлээх болж байна. Монгол улсад энэ спорт хөгжөөд удаагүй. Одоо л “The Mongolz” гэж хүлээн зөвшөөрч үндэсний шигшээ багт нэгтгэснээс биш, тэднийг подвалд бэлтгэлээ хийн, тэмцээнд оролцох виз нь ч гарахгүй явахад хэн ч тоогоогүй, компьютерийн ард цаг нөхцөөгчид гэдэг байсан нь саяхан. Гэтэл одоо дэлхийд түүчээлж эхлэхээр нь олсон орлогоос нь татвар авна, өдий хүргэсэн ивээн тэтгэгчийг нь хааж, эрүүгийн хариуцлага хүлээлгэнэ гэдэг ямар гээчийн хандлага, засгийн газрын дэмжлэг вэ?
Олон улсад уг асуудлыг шийдэж чадсан жишээнүүд байдаг бөгөөд бүх төрлийн бооцоонд лиценз олгож, луйвар, гэмт хэрэг, мөнгө угаалт зэргээс сэргийлэн, орлогын тодорхой хувийг нийгмийн сайн сайханд зориулах зэрэг зохицуулалтыг хийдэг байна.
Мэдээж энэ хууль олон мянган залуус цахим мөрийтэй тоглоом тоглож, амьдралаа алдахаас урьдчилан сэргийлж буй зохицуулалт мөн. Гэвч мөрөөдлөөрөө эх орноо дэлхийн тавцанд таниулж яваа залуусаа хоморгонд нь хохироож болохгүй гэсэн иргэдийн санал шүүмж байгаа юм. Энэ асуудлын хариултыг олон хүмүүс чих тавин хүлээж байна
