Улаанбаатар хотод энэ оны нэгдүгээр сарын байдлаар орон сууцны үнэ өмнөх оны мөн үеийнхээс 13.3, өмнөх сарынхаас 0.5 хувиар өсжээ.
Тодруулбал, шинэ орон сууцны үнэ өмнөх оны мөн үеийнхээс 11.2 хувиар өсөж, өмнөх сарынхаас хоёр хувиар буурчээ. Харин хуучин орон сууцны үнэ өмнөх оны мөн үеийнхээс 15, өмнөх сарынхаас 2.3 хувиар өссөн үзүүлэлттэй гарлаа.
Шинэ орон сууцны нэг метр квадрат талбайн дундаж үнэ 4.53 сая төгрөг байгаа юм. Тэгвэл Сүхбаатар дүүрэгт орон сууцны үнэ 5.82 сая төгрөг байгаа бөгөөд тус дүүрэгт шинэ орон сууцны дундаж үнэ 40 хувиар нэмэгдсэн нь хамгийн их аж. Харин Хан-Уул дүүрэгт шинэ орон сууцны үнэ 8.6 хувиар өссөн нь хамгийн бага үзүүлэлт юм байна.
Үүнээс гадна хуучин орон сууцны үнэ Сүхбаатар дүүрэгт 30.6, Хан-Уулд, 12.5 хувиар өссөнийг Үндэсний статистикийн хорооноос мэдээлжээ.
