“Эрдэнэс Тавантолгой” ХХК-ийн Төлөөлөн Удирдах зөвлөл (ТУЗ) өнөөдөр хуралдаж, 1072 хувьцааны ногдол ашиг олгох, эсэхийг шийдэх ёстой. Учир нь Компанийн тухай хуулийн 46.5-т зааснаар ТУЗ санхүүгийн жил дууссанаас хойш 50 хоногийн дотор ногдол ашиг хуваарилах эсэх талаар хэлэлцэн шийдвэрлэсэн байхаар заасан.
Санхүүгийн жил өнгөрсөн арванхоёрдугаар сарын 31-нээр дууссан тул уг хуульд заасан ногдол ашиг олгох, эсэхийг шийдэх хугацаа маргааш дуусаж буй юм. “Эрдэнэс Тавантолгой” ХХК-ийн жилийн эцсийн тайланг энэ сарын 9-нд гаргасан билээ. Тус компанийн хэвлэл мэдээлэл хариуцсан ажилтнаас тодруулахад “Өчигдөр Аудитын хороо хуралдсан. ТУЗ өнөөдөр хуралдана гэж бодож байна. Учир нь хуралдах эцсийн хугацаа маргааш” гэв.
Дунджаар хувьцаа эзэмшигч иргэн бүрд 350 орчим мянган төгрөг ногдохоор байгааг Засгийн газар мэдээлсэн бөгөөд эхний ээлжийн 135 мянган төгрөгийг оны өмнө олгосон. Харин үлдсэнийг нь хүйтний улирал, инфляц зэргийг харгалзан олгохоо мэдэгдсэн юм.
