Ж.Мөнхбатыгаа явуулчихлаа, одоо нөхөн сонгууль уу?

УИХ-ын чуулганы нэгдсэн хуралдаанаар Ж.Мөнхбат гишүүнийг бүрэн эрхээс нь чөлөөлөх эсэх асуудлыг хэлэлцээд санал хураалт явуулсан. Тодруулбал, УИХ-ын гишүүн Ж.Мөнхбатыг гишүүнээс нь чөлөөлөхийг дэмжинэ гэсэн саналын томъёоллоор санал хураалт явуулсан билээ. Хуралдаанд оролцсон гишүүдийн 59.9 хувь нь гишүүнээс нь чөлөөлөхийг дэмжсэн. Ингэснээр УИХ-ын гишүүн Ж.Мөнхбатыг бүрэн эрхээс нь чөлөөлж, одоогийн парламент 75 гишүүнтэй үлдээд байгаа юм. 

Гишүүнээсээ чөлөөлөгдсөн Ж.Мөнхбат УИХ-ын сонгуульд Архангай аймгаас нэр дэвшин хоёр ч удаагийн сонгуульд ялалт байгуулаад байсан. 

Тэгвэл төрд төлөөлүүлэхээр сонгосон гурван гишүүний нэг нь ийнхүү "явчихсан" тул Архангай аймгийн сонгогчдод бас нэгэн итгэл хүлээлгэх гишүүн хэрэгтэй болж таарч байгаа юм. 

Харин өчигдрийн УИХ-ын чуулганы хуралдаанаар УИХ-ын гишүүн Ш.Адьшаа энэ талаар, Ж.Мөнхбатыг УИХ-ын гишүүнээр чөлөөлөгдсөний дараа ирэх зургадугаар сард Архангай аймагт нөхөн сонгууль болох эсэх талаар тодруулсан. Түүний асуултад УИХ-ын гишүүн Н.Энхболд  хариулахдаа “Хуулиар бол дараагийн сонгууль болохоос зургаан сарын өмнө орон гарсан тохиолдолд нөхөн сонгууль явуулах зохицуулалт бий. Энэ талаар ярих хэрэг гарах байх” гэв.

УИХ-ын сонгуулийн тухай хууль:

• 4.7."Нөхөн сонгууль" гэж Улсын Их Хурлын гишүүний орон гарсан суудлыг нөхөх зорилгоор явагдах сонгуулийг ойлгоно.
• 9.9.Улсын Их Хурал нөхөн сонгуулийг санал авах өдрийн хамт санал авах өдрөөс 70-аас доошгүй хоногийн өмнө нөхөн сонгууль явуулах нөхцөл байдал үүссэнээс хойш 50 хоногийн дотор энэ хуульд нийцүүлэн товлон зарлана гэж заажээ.