АН-ын хатуу гишүүнчлэлтэй холбоотой асуудал дээр ажиллаж байна

УИХ дахь Ардчилсан намын бүлэг хуралдан Сонгуулийн хуулиар санал дүгнэлтээ нэгтгэжээ. 

Энэ талаар тус бүлгийн дарга О.Цогтгэрэл: Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулах тухай хуулийн төслийг хэлэлцлээ. Уг хуулийн төсөл нь УИХ-д өргөн баригдсан ч нэгдсэн чуулганаар хэлэлцэгдэхгүй багагүй хугацаа өнгөрсөн. Уг хуулийн төслийн нэгийг нь Засгийн газар, нөгөөг нь АН-ын бүлгийн гишүүн Ш.Адьшаа өргөн барьсан. Өөрөөр хэлбэл, хоёр хувилбар байгаа гэсэн үг. Төрийн өндөр албан тушаалтны ойрын хамаарал бүхий этгээд тодорхой албан тушаалд томилогдохгүй байх, төрөөс баталгаа гаргасан зээл, аливаа хөнгөлөлттэй гэрээт ажлууд дээр оролцохгүй байх зэрэг заалт хуулийн төсөлд орсон. Гэхдээ тэдгээр заалтыг нягтлах шаардлагатай. Иймд энэ тал дээр мэдээлэл сонсож ярилцлаа. Хоёрдугаарт, Улстөрийн намын тухай хуулийн төслийг ойрын хугацаанд Ерөнхийлөгчийн зүгээс өргөн барих гэж байна.  Энэ хуулийн төсөлд ямар санал өгөх вэ гэдэг дээр ярилцсан гэв.

Үндэсний бодлогын хорооны дарга М.Чимэддорж: Ерөнхийлөгчөөс өргөн барих гэж буй уг хуулийн төслийн ажлын хэсэг таван зүйл дээр саналаа нэгтгэсэн. Монгол Улс өнөөдөр маш их улстөржсөн орон болсон байна. Иймд намын хатуу гишүүнчлэлтэй холбоотой асуудал дээр ажиллаж байна. Удаад нь намын санхүүжилтын зохицуулалт ямар байх тухайд анхаарч байгаа. Намуудын санхүүжилт нь улстөрийн намууд бизнес, улстөрийн сонирхлын тодорхой бүлэглэлүүдээс ангид байх үндэс учраас эл асуудалд онцгой анхаарах нь зөв юм. Мөн улстөрийн намын бүтэц, зохион байгуулалтыг хуульчлах ёстой. Улстөрийн нам цомхон, бага зардлаар үйл ажиллагаа явуулдаг бодлогын чиглэлтэй байх ёстой. Намууд нь дэргэдээ бодлогын судалгааны байгууллагатай байх нь зүйтэй гэж үзэж байна гэлээ.