Өнгөрсөн өвлийн шатахууны хомстолыг өнөөдөр ч бид мартаагүй. Гол шалтгаан нь Увс аймгийн 100 жилийн ойд иргэд ихээрээ явсан учраас нөөц дуусгасан гэж тайлбарлаж байлаа.
Ерөөс бүх буруу иргэдэд л бий. Харин бодлогоор хангаж, зөв зохион байгуулалт хийх ёстой дарга сэтэрнүүд шатахууны хомстолд ямар ч буруугүй юм байна. Холбогдох сайд Г.Дамдинням Солонгос руу очиж шатахуун гуйж байгаа сурагтай. Харин ЗГХЭГ-ын дарга буюу засгийн гал тогоог баригч Б.Энхбаяр хөдөөгүүр зугаалж явна. Хууль зүйн сайд шиг хилийн багана эргээд явж байх жишээтэй.
ЗГХЭГ-ийн даргад хилийн баганаас илүүтэй үүсээд байгаа шатахууны хомсдлыг яаж арилгах вэ гэдэг дээр УУЭБ-ийн сайд Г.Дамдиннямтайгаа хамтраад гарц, гаргалгаа, шийдэл хайж байх ёстой юмсан.
ЗГХЭГ-ийн даргын хамгийн гол үүрэг нь Засгийн газраа бодлогоор хангаж, шаардлагатай үед тэргүүн эгнээнд ажиллаж байх ёстой. Гэтэл Б.Энхбаяр ЗГХЭГ-ын дарга болсноосоо хойш нэг ч ажлын хэсэг хуралдуулсангүй, нэг ч тоймтой ажил хийгээгүй.
Өмнө нь Хууль зүйн сайд байхдаа ганцхан хүнийг нэр цохож хэвлэлийн хурал хийдэг, боломж гарвал сэтгүүлчдийг гүтгэдгээс өөрөөр бодлогын ямар ажил хийснийг нь санах хүн байна уу?
Ийм л сайд нартай бид шатахууны хомстолыг өөрсдөдөө үүрүүлж, шөнөжин шатахуунд оочерлож, өдөржин ажил дээрээ үүрэглэж, амьдрах гэж, ажиллах гэж үйлээ эдэлж үстэй толгойгоо зуулгааж суух ёстой гэж үү?!
