•Монгол Улсын Их Хурлын 2024 оны 72 дугаар тогтоолоор улсын зэрэглэл бүхий Багануур, Налайхыг бие даасан хот, Багахангай дүүргийг дагуул хот болгон хөгжүүлэхээр шийдвэрлэсэн. Налайх, Багануур дүүргүүд нь авто зам, барилга, инженерийн дэд бүтцээр хангагдсан, ажиллах хүчний нөөц сайтай учраас Улаанбаатар хотын төвлөрлийг сааруулах стратегийн түшиц бүс болон хөгжих юм. Хүн амын төвлөрөл нэмэгдэж буй өнөөгийн нөхцөлд эдгээр бүсэд дэд бүтцийн хүртээмж, ялангуяа дулаан хангамжийн хүчин чадлыг нэмэгдүүлэх, шинэ дулааны станц байгуулах шаардлага бий болоод байна.
•Гурван дүүрэг тус бүр өөрийн онцлог эдийн засгийн бүтэцтэй.
Багануурт хүнд үйлдвэр, хими технологи, аж үйлдвэрийн парк хөгжүүлэх боломжтой.
Налайх дүүрэгт барилгын материалын үйлдвэр, технологийн парк, аялал жуулчлал, үйлдвэр үйлчилгээний бүс байгуулагдана.
Багахангай дүүрэгт тээвэр, логистик, боловсруулах үйлдвэрлэл хөгжүүлэх боломжтой.
•Дээрх гурван дүүрэг нь өөр өөрийн хөгжлийн онцлог, эдийн засгийн бүтэцтэй боловч харилцан бие биеэ нөхөж үйлдвэрлэл, үйлчилгээний бүсчлэлээр уялдаа холбоотойгоор хөгжих боломжтой. Энэ нь бүсчилсэн хөгжлийн бодлогын хүрээнд эдийн засгийн өсөлтийг хурдасгах, хөгжлийг цогцоор нь авч үзэх шинэ гарц болж байна. Иймд энэхүү зорилгыг бодит ажил хэрэг болгохоор хөгжлийн хамтарсан кластер буюу “Багануур, Багахангай, Налайх хотуудын хөгжлийн концепц”-ийг тодорхойлох судалгааны ажлыг санаачлан хэрэгжүүлж байна. Судалгаа нь дүүрэг тус бүрийн эдийн засгийн чиглэлийг тодорхойлох, хөрөнгө оруулалтын төсөл боловсруулах, байршлын оновчлол хийх гэсэн гурван үндсэн чиглэлтэй.
•Эдгээр ажлыг уялдуулснаар гурван дүүрэг харилцан бие биеэ дэмжсэн, уялдаа холбоотой хөгжлийн шинэ загварт шилжинэ. Ийнхүү уул уурхайн ууган голомт, эрчим хүчний эх үүсвэр, тээвэр логистикийн төв болсон Налайх, Багануур, Багахангай дүүргүүд нь бүсчилсэн хөгжлийн бодлогын хүрээнд эдийн засгийн төрөлжилт, аж үйлдвэр, дэд бүтцийн шинэ төвүүд болон төлөвшиж байна.
